全城走塑︱大嘥鬼解畫超市即場食=外賣　直擊DONKI「盲盒」一夜消失變回透明膠盒

【環保走塑/管制即棄塑膠/堂食/外賣/DONKI盲盒壽司/DONKI盲盒魚生飯/紙餐盒】政府在4.22起實施首階段管制即棄塑膠，禁止堂食及外賣提供膠叉、膠刀丶膠匙、膠飲管、膠攪拌棒及所有發泡膠餐具。隨即日本超市DonDonDonki將壽司拼盤、熟食等轉用紙盒包裝，被網民形容是「盲盒壽司」，「新唔新鮮都唔知」，事件引起市民關注。但昨日(25日)起「盲盒壽司」已經一夜消失，因為環保署其後透過「大嘥鬼」Facebook專頁解畫，指以零售業務為主的超市出售的已包裝的食物，例如盒裝壽司，即使消費者選擇留在超市範圍內即場享用，與外賣的情況一樣，仍可以選用膠盒和透明膠蓋來裝外賣壽司。

▲ 終於睇到魚生新唔新鮮。越玲瓏攝

最新影片:

TOPick記者今日（26日）到DONKI分店視察，「盲盒壽司」已經成為「絕響」，全部熟食、壽司、魚生等變回膠盒，而現場的告示都已經撤回，顧客終於可以目測壽司新唔新鮮！

▼點擊圖片放大

+5

+4

全城走塑︱大嘥鬼Facebook專頁回應

環保署透過「大嘥鬼」Facebook專頁回應：「我睇唔到啲壽司新唔新鮮！本鬼留意到近日有日式超市賣盲盒壽司，令到大家有迷思，於是本鬼即刻搵左日式超市了解。原來日式超市擔心顧客買咗外賣包裝嘅壽司之後即場食用，所以用咗非塑膠盒同蓋，變咗盲盒。

其實以零售業務為主嘅超市，佢哋都會售賣各種各樣已包裝好嘅食物（例如盒裝壽司）供客人選購。但係，鬼鬼都有朋友試過買咗盒壽司之後，因為太肚餓，會選擇留喺超市範圍內即場享用。呢啲情況，其實同一般銷售和外賣嘅情況一樣，所以超市仍然可以用膠盒和膠蓋嚟裝外賣壽司，咁當然，用透明盒都可以啦，客人仲可以清楚分辨食物質素同款式添。

「仲有呀，本鬼都聽到最近好似有餐廳誤以為在新法例下用膠盒打包會違法！ 其實如果客人選擇將堂食食物打包，呢啲係屬於外賣情況，食肆係可以提供膠杯和膠食物盒畀客人拎走㗎！我哋會喺適應期探訪餐廳和零售處所，同佢哋講清楚以上種種做法，同埋睇下佢哋有冇對法例有任何誤解或者有唔清楚嘅地方。點都好，客人本身唔會因為用咗受管制的即棄塑膠產品而觸犯法例，大家絕對唔洗擔心！」

中小學測考季即將來臨，TOPick精選名校的中、英、數、常練習題：立即免費下載

HKET App已全面升級，TOPick推出親子、健康、娛樂、港聞及休閒生活資訊及影片，立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5